ஐந்தாம் திருமுறை-68

5.068.திருநள்ளாறு 

திருக்குறுந்தொகை

திருச்சிற்றம்பலம் 

இத்தலம் சோழநாட்டிலுள்ள சப்த தியாகர் தலங்களிலொன்று. 

சுவாமிபெயர் - தெர்ப்பாரணியர். 

தேவியார் - போகமார்த்தபூண்முலையம்மை. 

1750 உள்ளா றாததோர் புண்டரி கத்திரள்

தௌளா றாச்சிவ சோதித் திரளினைக்

கள்ளா றாதபொற் கொன்றை கமழ்சடை

நள்ளா றாவென நம்வினை நாசமே. 5.068.1

  உள்ளே தன் நிறம் கெடாததாகிய ஒப்பற்ற தாமரைத் தொகுதியின் தௌவு நீங்காததாகிய சிவ ஒளிப் பிழம்பினை, தேன் நீங்காத பொன்போன்ற கொன்றைகமழும் சடையினை உடைய "நள்ளாறா!" என்று கூற நம் வினைகள் நாசமாகும்.

1751 ஆர ணப்பொரு ளாமரு ளாளனார்

வார ணத்துரி போர்த்தம ணாளனார்

நாரணன் நண்ணி யேத்துநள் ளாறனார்

கார ணக்கலை ஞானக் கடவுளே. 5.068.2

  திருமால் பொருந்தி ஏத்துகின்ற நள்ளாற்று இறைவர், வேதத்தின் பொருளாக விளங்கும் அருளை ஆள்பவர்; யானையின் தோலைப் போர்த்த மணவாளர்; எல்லாவற்றுக்கும் மூலகாரணமாகிய கலைஞானக்கடவுள் ஆவர்.

1752 மேகம் பூண்டதோர் மேருவிற் கொண்டெயில்

சோகம் பூண்டழல் சோரத்தொட்டான் அவன்

பாகம் பூண்டமால் பங்கயத் தானொடு

நாகம் பூண்டுகூத் தாடுநள் ளாறனே. 5.068.3

  மேகத்தினைத் தன் உச்சியிற் கொண்டதாகிய மேருமாமலையாகிய வில்லைக்கொண்டு, முப்புரங்களும் சோகம் பூணுமாறு கனல் சோரத் தொட்டவனாகிய அவன், தன்னொரு பாகத்திற்கொண்ட திருமாலும், நான்முகனும் வழிபடுமாறு நாகம் பூண்டு கூத்தாடும் நள்ளாற்று இறைவன்.

1753 மலியுஞ் செஞ்சடை வாளர வம்மொடு

பொலியும் பூம்புனல் வைத்த புனிதனார்

நலியுங் கூற்றை நலிந்தநள் ளாறர்தம்

வலியுங் கண்டிறு மாந்து மகிழ்வனே. 5.068.4

  செஞ்சடையில் மலிந்த பாம்பினோடு பொலிகின்ற கங்கையை வைத்த புனிதனாராகிய கூற்றுவனை நலிந்த நள்ளாறரது அருளாற்றலையும் கண்டு இறுமாந்து மகிழ்வேன்.

1754 உறவ னாய்நிறைந் துள்ளங் குளிர்ப்பவன்

இறைவ னாகிநின் றெண்ணிறைந் தானவன்

நறவ நாறும் பொழிற்றிரு நள்ளாறன்

மறவ னாய்ப்பன்றிப் பின்சென்ற மாயமே. 5.068.5

  தேன்மணக்கும் பொழிலை உடைய திருநள்ளாற்றுப்பெருமான் உற்றுப்பொருந்தியவனாய் நிறைந்து உள்ளத்தைக் குளிர்விப்பவன்; இறைவனாகிநின்று எண்ணத்தில் நிறைந்தவன்; மறம் உடையவனாய் அருச்சுனனின் பொருட்டுப் பன்றியின்பின் சென்ற மாயம் என்னையோ?

1755 செக்க ரங்கழி செஞ்சுடர்ச் சோதியார்

நக்க ரங்கர வார்த்தநள் ளாறனார்

வக்க ரன்னுயிர் வவ்விய மாயற்குச்

சக்க ரம்மருள் செய்த சதுரரே. 5.068.6

  சிவந்த வானமும் அழகிற்குத்தோற்று உள்ள மழிதற்குக் காரணமாகிய செஞ்சுடர் வீசும் சோதியரும், திகம்பரருமாகிய பாம்பினை ஆர்த்துக் கட்டிய நள்ளாற்றிறைவர் வக்கராசுரன் உயிர் போக்கியவராகிய திருமாலுக்குச் சக்கரப் படையை அருள் செய்த திறம் உடையவர்.

1756 வஞ்ச நஞ்சிற் பொலிகின்ற கண்டத்தர்

விஞ்சை யிற்செல்வப் பாவைக்கு வேந்தனார்

வஞ்ச நெஞ்சத் தவர்க்கு வழிகொடார்

நஞ்ச நெஞ்சர்க் கருளுநள் ளாறரே. 5.068.7

  நைந்த உள்ளம் உடையவர்களுக்கு அருளும் நள்ளாற்று இறைவர் வஞ்சனைமிக்க நஞ்சினாற் பொலிகின்ற திருக்கழுத்தினர்: தெய்வச் செல்வப்பாவையாகிய உமா தேவிக்கு வேந்தர்: வஞ்சனை உடைய நெஞ்சத்தவர்களுக்கு வழி கொடாதவர்.

1757 அல்ல னென்று மலர்க்கரு ளாயின

சொல்ல னென்றுசொல் லாமறைச் சோதியான்

வல்ல னென்றும்வல் லார்வளம் மிக்கவர்

நல்ல னென்றும்நல் லார்க்குநள் ளாறனே. 5.068.8

  அலர்க்கு அல்லன் என்றும், அருளாயின சொல்லன் என்றும், சொல்லாமறைச் சோதியானாகிய வல்லன் என்றும் துதிக்க வல்லவர் வளம் மிக்கவராவர். அத்தகைய நல்லார்க்கு நள்ளாறன் என்றும் நல்லன்.

1758 பாம்ப ணைப்பள்ளி கொண்ட பரமனும்

பூம்ப ணைப்பொலி கின்ற புராணனும்

தாம்ப ணிந்தளப் பொண்ணாத் தனித்தழல்

நாம்ப ணிந்தடி போற்றுநள் ளாறனே. 5.068.9

  நாம் பணிந்து அடிபோற்றும் நள்ளாற்று இறைவன், பாம்பாகிய அணையத்தக்க பள்ளியினைக் கொண்ட திருமாலும், பூவாகிய பணைத்த பள்ளியிற் பொலிகின்ற புராணனாகிய நான்முகனும், தாம் பணிந்து அளக்க இயலாத ஒப்பற்ற தனித்தழலாக உள்ளவன்.

1759 இலங்கை மன்ன னிருபது தோளிற

மலங்க மால்வரை மேல்விரல் வைத்தவர்

நலங்கொள் நீற்றர்நள் ளாறரை நாடொறும்

வலங்கொள் வார்வினை யாயின மாயுமே. 5.068.10

  இலங்கை மன்னனாகிய இராவணன் இருபது தோள்களும் இற்று மனஞ் சுழலும்படியாகத் திருக்கயிலாயப் பெருவரையின் மேல் திருவிரல் ஊன்றியவரும், நன்மை மிகுந்த திருநீற்றருமாகிய நள்ளாறரை நாள்தோறும் வலம் வந்து வணங்குவார் வினைகள் மாயும்.

திருச்சிற்றம்பலம்