ஐந்தாம் திருமுறை-91

5.091.தனி 

திருக்குறுந்தொகை

திருச்சிற்றம்பலம் 

1964 ஏயி லானையெ னிச்சை யகம்படிக்

கோயி லானைக் குணப்பெருங் குன்றினை

வாயி லானை மனோன்மணி யைப்பெற்ற

தாயி லானைத் தழுவுமென் ஆவியே. 5.091.1

  தமக்குமேல் தலைவன் இல்லாதவன். உள்ளக்கோயிலான். குணக்குன்று. வாழ்த்துவோர் வாய் இல்லமாக உடையவன். சத்தியை ஈன்றவன். தனக்கொரு தாய் இல்லாதவன். அவனை என்னுயிர் தழுவும்.

1965 முன்னை ஞான முதல்தனி வித்தினைப்

பின்னை ஞானப் பிறங்கு சடையனை

என்னை ஞானத் திருளறுத் தாண்டவன்

தன்னை ஞானத் தளையிட்டு வைப்பனே. 5.091.2

  பழைய ஞான முதல் தனி வித்தும், பின்னை ஞானம் பிறங்கு சடையனும், என்னை இருள் நீக்கி ஞானத்தால் ஆண்டவனும் ஆகிய இறைவன் தன்னை ஞானமென்னும் தளையினால் பிணித்து உள்ளத்தே வைப்பேன்.

1966 ஞானத் தால்தொழு வார்சில ஞானிகள்

ஞானத் தால்தொழு வேனுனை நானலேன்

ஞானத் தால்தொழு வார்கள் தொழக்கண்டு 

ஞானத் தாயுனை நானுந் தொழுவனே. 5.091.3

  சில ஞானிகள் நின்னை ஞானத்தால் தொழுவார்கள்; ஞானத்தால் உன்னை நான் தொழும் திறம் உடையேனல்லேன்; ஞானத்தால் தொழுகின்றவர்கள் தொழுதலைக் கண்டு, ஞானவடிவாகிய பொருளே! உன்னை நானும் தொழுவன்.

1967 புழுவுக் குங்குணம் நான்கெனக் கும்மதே

புழுவுக் கிங்கெனக் குள்ளபொல் லாங்கில்லை

புழுவி னுங்கடை யேன்புனி தன்தமர்

குழுவுக் கெவ்விடத் தேன்சென்று கூடவே. 5.091.4

  புழுவுக்கும் குணம் நான்கு; எனக்கும் அவ்வாறே. ஆயினும் எனக்குள்ள பொல்லாங்கு புழுவுக்கில்லையாதலின் புழுவினுங்கடையேனாகிய அடியேன் புனிதனாகிய பெருமானைச் சார்ந்த அடியார் குழுவினுக்குச் சென்றுகூட எவ்விடத்தை உடையேன் ஆவேன்?

1968 மலையே வந்து விழினும் மனிதர்காள்

நிலையில் நின்று கலங்கப் பெறுதிரேல்

தலைவ னாகிய ஈசன் தமர்களைக்

கொலைசெய் யானைதான் கொன்றிடு கிற்குமே. 5.091.5

  மனிதர்களே! மலையே வந்து விழுந்தாலும் தன் நிலையில் நின்று கலங்காதீர்கள். அவ்வாறு கலங்குவீர்களேயானால் ஈசன் அடியார்களை ஐம்பொறிகளாகிய யானைகளே கொன்றுவிடும்.

1969 கற்றுக் கொள்வன வாயுள நாவு

இட்டுக் கொள்வன பூவுள நீருள

கற்றைச் செஞ்சடை யானுளன் நாமுளோம்

எற்றுக் கோநம னால்முனி வுண்பதே. 5.091.6

  திருவைந்தெழுத்தைக் கற்றுக்கொள்ளுவதற்கு வாயும் நாவும் உள்ளன; இட்டுக்கொள்ளப் பூவும், நீரும் உள்ளன;தொகுதியாகிய சிவந்த சடையான் உள்ளான்; நாம் உள்ளோம். இவையெல்லாம் இருக்க எமனால் முனிவுண்பது எற்றுக்கு?

1970 மனிதர் காளிங்கே வம்மொன்று சொல்லுகேன்

கனிதந் தாற்கனி யுண்ணவும் வல்லிரே

புனிதன் பொற்கழல் ஈசனெ னுங்கனி

இனிது சாலவு மேசற்ற வர்கட்கே. 5.091.7

  மனிதர்களே! இங்கே வாருங்கள்; ஒன்று சொல்லுவேன்; பழம் தந்தால் பழத்தை உண்ணவும் வல்லமை உடையீரோ? புனிதனும் கழல்கள் அணிந்த இறைவனும் ஆகிய கனி; ஏசற்றவர்களுக்கு மிகவும் இனியது; காண்பீராக.

1971 என்னை யேது மறிந்தில னெம்பிரான்

தன்னை நானுமுன் ஏது மறிந்திலேன்

என்னைத் தன்னடி யானென் றறிதலும்

தன்னை நானும் பிரானென் றறிந்தெனே. 5.091.8

  முன் என்னையே ஏதும் அறிந்திலேன்; எம்பெருமானையும் அறிந்திலேன். என்னைத் தன் அடியான் என்றுபெருமான் அறிதலும் தன்னைக்காணும் தலைவன் என்று நானும் அறிந்துகொண்டேன்.

1972 தௌளத் தேறித் தௌந்துதித் திப்பதோர்

உள்ளத் தேற லமுத வொளிவெளி

கள்ளத் தேன்கடி யேன்கவ லைக்கடல்

வெள்ளத் தேனுக்கெவ் வாறு விளைந்ததே. 5.091.10

  மிக்குத் தௌந்து தித்திப்பதாகிய ஒப்பற்ற உள்ளத்தேன்; அமுதப்பேரொளியும் வெளியும் ஆகிய அவ் அநுபவம் கள்ளம் உடையேனும், கவலைக்கடலைக் கடியாது அவ்வெள்ளத்தே விழுந்துகிடப்பேனுமாகிய எனக்கு விளைந்தது எவ்வாறு?

திருச்சிற்றம்பலம்