மூன்றாம் திருமுறை-15

3.015.திருவெண்காடு 
பண் - காந்தாரபஞ்சமம் 
திருச்சிற்றம்பலம் 

இத்தலம் சோழநாட்டிலுள்ளது. 
சுவாமிபெயர் - சுவேதாரணியேசுவரர். தேவியார் - பிரமவித்தியாநாயகியம்மை. 

2954 மந்திர மறையவை வான வரொடும்இந்திரன் வழிபட நின்ற எம்மிறைவெந்தவெண் ணீற்றர்வெண் காடு மேவியஅந்தமு முதலுடை யடிக ளல்லரே 3.015.1
பஞ்சாக்கர மந்திரத்தைத் தனி நடுப்பகுதியில் கொண்ட வேதங்களும், தேவர்களும், இந்திரனும் வழிபட வீற்றிருக்கின்ற எங்கள் இறைவனாய், வெந்த வெண்ணீற்றினைத் திருமேனியில் பூசித் திருவெண்காடு என்னும் திருத்தலத்தில் வீற்றிருந்தருளுகின்ற சிவபெருமான் அந்தமும், ஆதியுமாகிய அடிகள் அல்லரோ? 

2955 படையுடை மழுவினர் பாய்புலித் தோலின் உடைவிரி கோவண முகந்த கொள்கையர்விடையுடைக் கொடியர்வெண் காடு மேவியசடையிடைப் புனல்வைத்த சதுர ரல்லரே 3.015.2
இறைவர் மழுவைப் படையாக உடையவர். பாய்கின்ற புலித்தோலை ஆடையாக உடையவர். கோவணத்தை உகந்து அணிந்தவர். இடபவடிவம் பொறிக்கப்பட்ட கொடியுடையவர். திருவெண்காடு என்னும் திருத்தலத்தில் வீற்றிருந்தருளுகின்ற சிவபெருமான் சடையிலே கங்கையைத் தாங்கிய திறமையானவர் அல்லரோ? 

2956 பாலொடு நெய்தயிர் பலவு மாடுவர்தோலொடு நூலிழை துதைந்த மார்பினர்மேலவர் பரவுவெண் காடு மேவியஆலம தமர்ந்தவெம் மடிக ளல்லரே 3.015.3
இறைவர் பாலொடு, நெய், தயிர் மறற்றும் பலவற்றாலும் திருமுழுக்கு ஆட்டப்படுபவர். யானைத்தோலைப் போர்வையாகவும், புலித்தோலை ஆடையாகவும் அணிந்தவர். முப்புரி நூலணிந்த மார்பினர், சிவஞானிகள் துதிக்கின்ற திருவெண்காடு என்னும் திருத்தலத்தில் வீற்றிருந்தருளும் சிவபெருமான் கல்லால மரத்தின்கீழ் வீற்றிருந்து அறம் உரைத்த எம் தலைவர் அல்லரோ? 

2957 ஞாழலுஞ் செருந்தியு நறுமலர்ப் புன்னையுந்தாழைவெண் குருகயல் தயங்கு கானலில்வேழம துரித்தவெண் காடு மேவியயாழின திசையுடை யிறைவ ரல்லரே 3.015.4
புலிநகக் கொன்றையும், செருந்தியும், நறுமணமிக்க புன்னை மலர்களும், தாழையும், குருக்கத்தியும் விளங்கும் கடற்கரைச் சோலையுடைய திருவெண்காடு என்னும் திருத்தலத்தில், யானையின் தோலையுரித்த ஆற்றல் உடையவராயும், யாழிசை போன்ற இனிமை உடையவராயும் உள்ள சிவபெருமான் வீற்றிருந்தருளுகின்றார் அல்லரோ? 

2958 பூதங்கள் பலவுடைப் புனிதர் புண்ணியர்ஏதங்கள் பலவிடர் தீர்க்கு மெம்மிறைவேதங்கண் முதல்வர்வெண் காடு மேவியபாதங்கள் தொழநின்ற பரம ரல்லரே 3.015.5
எம் இறைவர், பூதகணங்கள் பல உடைய புனிதர். புண்ணிய வடிவினர். தம்மை வழிபடுபவர்களின் குற்றங்களையும், துன்பங்களையும் தீர்த்தருளுபவர். அவர் வேதங்களில் கூறப்படும் முதல்வர். திருவெண்காடு என்னும் திருத்தலத்தில் வீற்றிருந்தருளும் அவர்தம் பாதங்கள் அனைவராலும் தொழப்படும் நிலையில் விளங்கும் பரம்பொருள் அல்லவோ? 

2959 மண்ணவர் விண்ணவர் வணங்க வைகலும் எண்ணிய தேவர்கள் இறைஞ்சும் எம்மிறைவிண்ணமர் பொழில்கொள்வெண் காடு மேவியஅண்ணலை அடிதொழ அல்லல் இல்லையே 3.015.6
மண்ணுலகத்தோரும், விண்ணுலகத்தோரும், மற்றுமுள்ள தேவர்களும் தினந்தோறும் எங்கள் இறைவனை வழிபட்டுப் போற்றுகின்றனர். வானளாவிய சோலைகளையுடைய திருவெண்காடு என்னும் திருத்தலத்தில் வீற்றிருக்கின்ற அப் பெருமானின் திருவடிகளை வணங்குபவர்கட்குத் துன்பம் இல்லை. 

2960 நயந்தவர்க் கருள்பல நல்கி யிந்திரன்கயந்திரம் வழிபடநின்ற கண்ணுதல்வியந்தவர் பரவுவெண் காடுமேவியபயந்தரு மழுவுடைப் பரம ரல்லரே 3.015.7
விரும்பி வழிபடும் அடியவர்கட்கு வேண்டுவன வேண்டியவாறு அருளி, இந்திரனின் வெள்ளையானை வழிபட அதற்கும் அருள்புரிந்தவர் நெற்றிக்கண்ணுடைய சிவபெருமான் ஆவார். அனைவரும் அந்த இன்னருளை வியந்து போற்றும்படி திருவெண்காடு என்னும் திருத்தலத்தில் வீற்றிருந்தருளும் சிவபெருமான் பயந்தரு மழுப்படையுடைய பரமர் அல்லரோ? 

2961 மலையுட னெடுத்தவல் லரக்கன் நீள்முடி தலையுட னெரித்தருள் செய்த சங்கரர்விலையுடை நீற்றர்வெண் காடு மேவியஅலையுடைப் புனல்வைத்த அடிகள் அல்லரே 3.015.8
கயிலைமலையை எடுத்த கொடிய அரக்கனாகிய இராவணனின் நீண்டமுடி, தலை, உடல் ஆகியவற்றை நெரித்து, பின் அவன் தவறுணர்ந்து சாமகானம் பாட, அருள் செய்த சங்கரர், மதிப்புடைய திருநீற்றினைப் பூசியவர். அலையுடைய கங்கையைச் சடையில் தாங்கித் திருவெண்காடு என்னும் திருத்தலத்தில் வீற்றிருந்தருளும் பெருமான் அவர் அல்லரோ? 

2962 ஏடவிழ் நறுமலர் அயனு மாலுமாய்த்தேடவுந் தெரிந்தவர் தேர கிற்கிலார்வேடம துடையவெண் காடு மேவியஆடலை யமர்ந்தஎம் அடிகள் அல்லரே 3.015.9
பூவிதழ்களுடைய நறுமணம் கமழும் தாமரையில் வீற்றிருக்கும் பிரமனும், திருமாலும் திருமுடியையும், திருஅடியையும் காணத்தேடியும் காண்பதற்கு அரியவராய் நெருப்புமலையாய் விளங்கியவரும், பலபல வேடம் கொள்பவருமான இறைவன் திருவெண்காடு என்னும் திருத்தலத்தில் வீற்றிருந்து திருநடனம் புரிதலை விரும்பிய அடிகள் அல்லரோ? 

2963 போதியர் பிண்டியர் பொருத்தம் இல்லிகள்நீதிகள் சொல்லியும் நினைய கிற்கிலார் வேதியர் பரவுவெண் காடு மேவியஆதியை யடிதொழ அல்லல் இல்லையே 3.015.10
புத்தரும், சமணரும் பொருத்தம் இல்லாதவராய், இறையுண்மையை உணர்த்தும் நீதிகளை எடுத்துரைத்தும், நல்வாழ்வு இல்லாமையால் அவற்றை நினைத்துப் பார்த்தலும் செய்யாதவர் ஆயினர். எனவே அவர்களைச் சாராது, வேதம் ஓதும் அந்தணர்கள் பரவித் துதிக்கின்ற திருவெண்காடு என்னும் திருத்தலத்தில் வீற்றிருந்தருளுகின்ற அனைத்துலகுக்கும் முதற்பொருளாகிய சிவபெருமான் திருவடிகளைத் தொழத் துன்பம் இல்லையாம். 

2964 நல்லவர் புகலியுள் ஞான சம்பந்தன்செல்வன்எம் சிவனுறை திருவெண் காட்டின்மேற்சொல்லிய அருந்தமிழ் பத்தும் வல்லவர்அல்லலோ டருவினை அறுதல் ஆணையே 3.015.11
பசுபுண்ணியம், பதிபுண்ணியம் செய்த நல்லவர்கள் வசிக்கின்ற திருப்புகலியுள் அவதரித்த ஞானசம்பந்தன், செல்வனாகிய எம் சிவபெருமான் வீற்றிருந்தருளுகின்ற திருவெண்காட்டின் மேல் பாடிய அருந்தமிழ்ப் பாக்கள் பத்தினையும் பக்தியோடு ஓதவல்லவர்களுடைய துன்பங்களோடு அவற்றிற்குக் காரணமான அருவினையும் அறும் என்பது நமது ஆணையாகும். 

திருச்சிற்றம்பலம்