ஐந்தாம் திருமுறை-60

5.060.திருமாற்பேறு 

திருக்குறுந்தொகை

திருச்சிற்றம்பலம் 

இத்தலம் தொண்டைநாட்டிலுள்ளது. 

சுவாமிபெயர் - மால்வணங்குமீசர். 

தேவியார் - கருணைநாயகியம்மை. 

1672 ஏது மொன்று மறிவில ராயினும்

ஓதி யஞ்செழுத் தும்முணர் வார்கட்குப்

பேத மின்றி யவரவ ருள்ளத்தே

மாதுந் தாமும் மகிழ்வர்மாற் பேறரே. 5.060.1

  திருமாற்பேற்றில் எழுந்தருளியிருக்கும் இறைவர் ஏதொன்றும் அறியாதவர்கள் ஆனாலும், திருவஞ்செழுத்தை ஓதி உணர்வார்கட்கு வேற்றுமையின்றி அவரவர் உள்ளத்தே தாமும் அம்பிகையுமாய் மகிழ்ந்து வீற்றிருப்பர்.

1673 அச்ச மில்லைநெஞ் சேயரன் நாமங்கள்

நிச்ச லுந்நினை யாய்வினை போயறக்

கச்ச மாவிட முண்டகண் டாவென

வைச்ச மாநிதி யாவர்மாற் பேறரே. 5.060.2

  நெஞ்சே! அரன் திருநாமங்களை வினைகள் விட்டு நீங்குவதற்காக, நித்தமும் நினைவாயாக; உனக்கு அச்சமில்லை. திருமாற்பேற்று இறைவர், கைப்புள்ள ஆலகால விடத்தை உண்டதிருநீலகண்டர் என்று அன்பொடுகூற, சேமித்து வைத்த மாநிதிபோலப் பயன்படுவர்.

1674 சாத்தி ரம்பல பேசுஞ் சழக்கர்காள்

கோத்தி ரமுங் குலமுங்கொண் டென்செய்வீர்

பாத்தி ரஞ்சிவ மென்று பணிதிரேல்

மாத்தி ரைக்கு ளருளுமாற் பேறரே. 5.060.3

  சாத்திரங்கள் பலவற்றைப் பேசும் தீயவர்களே! கோத்திரம், குலம் முதலியவற்றைக் கொண்டு என்ன செய்வீர்! பணிதற்குரிய பொருள் சிவபரம்பொருளே என்று கொண்டு பணிவீராயின், திருமாற்பேற்று இறைவர் ஒருமாத்திரைப் பொழுதுக்குள் அருளுவர்.

1675 இருந்து சொல்லுவன் கேண்மின்க ளேழைகாள்

அருந்த வந்தரும் அஞ்செழுத் தோதினால்

பொருந்து நோய்பிணி போகத் துரப்பதோர்

மருந்து மாகுவர் மன்னுமாற் பேறரே. 5.060.4

  அறிவில்லாதவர்களே! சிந்தித்திருந்து சொல்லுவேன்; கேட்பீர்களாக! அரிய தவத்தினாலாய பயனைத்தரும் திருவஞ்செழுத்தை ஓதினால் திருமாற்பேற்று இறைவர் உம்மைப் பொருந்தியுள்ள நோய்களாகிய பிணிகள் போகும்படி துரத்துவதாகும் ஒப்பற்ற மருந்தும் ஆவர்.

1676 சாற்றிச் சொல்லுவன் கேண்மின் தரணியீர்

ஏற்றின் மேல்வரு வான்கழ லேத்தினால்

கூற்றை நீக்கிக் குறைவறுத் தாள்வதோர்

மாற்றி லாச்செம்பொ னாவர்மாற் பேறரே. 5.060.5

  உலகில் உள்ளவர்களே! எல்லோரும் அறியச் சொல்லுவேன் கேட்பீர்களாக; இடபத்தின் மேல் வருவாராகிய திருமாற்பேற்று இறைவர் திருவடிகளை ஏத்தினால், உம்மைக் கொள்ளவரும் கூற்றுவனை நீக்கி, குறைகளை அறுத்து, ஆள்கின்ற மாற்றில்லாத செம்பொன்னை ஒப்பர்.

1677 ஈட்டும் மாநிதி சால இழக்கினும்

வீட்டுங் காலன் விரைய அழைக்கினுங்

காட்டில் மாநட மாடுவாய் காவெனில்

வாட்டந் தீர்க்கவும் வல்லர்மாற்பேறரே. 5.060.6

  வருந்திச் சேர்த்த பெருஞ்செல்வத்தை மிகுதியாக இழந்தாலும், அழிக்கும் காலன் விரையவந்து அழைத்தாலும், சுடுகாட்டில் பெரிய நடனம் ஆடுகின்ற பெருமானே! காப்பாற்றுவாயாக! என்றழைத்தால், திருமாற்பேற்றிறைவர் வாட்டம் தீர்க்கவும் வல்லராவர்.

1678 ஐய னேயர னேயென் றரற்றினால்

உய்ய லாமுல கத்தவர் பேணுவர்

செய்ய பாத மிரண்டும் நினையவே

வையம் ஆளவும் வைப்பர்மாற் பேறரே. 5.060.7

  தலைவனே! சிவபெருமானே! என்று வாய்விட்டு அரற்றினால் உய்தி அடையலாம்; அதுவன்றியும் உலகத்திலுள்ளவர் பேணி மதிப்புச்செய்வர்; அப்பெருமானின் இரண்டு சிவந்த திருப்பாதங்களை நினைத்தால் திருமாற்பேற்று இறைவர் உலகத்தை ஆளவும் வைப்பர்.

1679 உந்திச் சென்று மலையை யெடுத்தவன்

சந்து தோளொடு தாளிற வூன்றினான்

மந்தி பாய்பொழில் சூழுமாற் பேறென

அந்த மில்லாதோ ரின்பம் அணுகுமே. 5.060.10

  செருக்கு தன்னை உந்தித்தள்ளுதலால் சென்று திருக்கயிலாயத்தை எடுத்தவனாகிய இராவணனது சந்தனம் பூசிய தோளும் தாள்களும் இறுமாறு திருவிரலால் ஊன்றிய பெருமானுக்குரியதும், பெண்குரங்குகள் பாயும் பொழில் சூழ்வதுமாகிய திருமாற்பேறு என்று கூறினால் முடிவில்லாத ஒப்பற்ற இன்பம் அணுகும்.

திருச்சிற்றம்பலம்