அமெரிக்க நாடாளுமன்றத்தின் பொருளாதாரம் மற்றும் நுகர்வோர் கொள்கைக் குழுத் தலைவராக இந்திய வம்சாவளியைச் சேர்ந்த ராஜா கிருஷ்ணமூர்த்தி நியமிக்கப்பட்டு உள்ளார்.
இந்திய வம்சாவளியைச் சேர்ந்த ராஜா கிருஷ்ணமூர்த்தி, புதுப்பிக்கத்தக்க எரிசக்தி மற்றும் தேசிய பாதுகாப்பு துறையில் சிறுதொழில்களுக்கான வாய்ப்பு குறித்து ஆய்வு செய்யும் குழுத் தலைவராக பணியாற்றினார். பின்னர் இல்லினாய்ஸ் மாகாணத்தில் இருந்து ஜனநாயகக் கட்சி சார்பில் இரண்டு முறை நாடாளுமன்றத்துக்கு தேர்ந்தெடுக்கப்பட்டு உள்ளார்.
மேலும் இல்லினாய்ஸ் மாகாண ஊழல் தடுப்பு பிரிவின் அட்டர்னி ஜெனரலாகவும் பதவி வகித்தார். இந்த நிலையில் அவர் நாடாளுமன்றத்தின் பொருளாதாரம் மற்றும் நுகர்வோர் கொள்கைக் குழுத் தலைவராக நியமிக்கப்பட்டு உள்ளார்.
நாடாளுமன்றத்தின் மேற்பார்வை கமிட்டியின் துணைக் கமிட்டியான பொருளாதாரம் மற்றும் நுகர்வோர் கொள்கைக் குழுவின் கீழ் கல்வி, தொழிலாளர் மேம்பாடு, வருமான சமத்துவமின்மை, சுகாதாரம், நுகர்வோர் பாதுகாப்பு, தகவல் தனியுரிமை ஆகியவை இடம் பெறுகின்றன.
இக்குழுவின் தலைவரானதன் மூலம் மேற்கூறிய துறைகளில் ஏற்படும் பிரச்னைகளுக்கு தீர்வு காண ராஜா கிருஷ்ணமூர்த்திக்கு அங்கீகாரம் வழங்கப்பட்டு உள்ளது.
இது குறித்து பேசிய அவர், “நாடாளுமன்ற கொள்கைக் குழுத் தலைவராக தேர்ந்தெடுக்கப்பட்டது மிகவும் மகிழ்ச்சியளிக்கிறது. இதன் மூலம் இந்த பதவி கிடைத்த முதல் தெற்காசிய நாட்டவர் என்ற சிறப்பு எனக்கு கிடைத்து உள்ளது. ” என்று கூறினார்.
|
